Stresi nga nxehtësia kërcënon vendet e punës në Shqipëri: ILO paralajmëron humbje të ndjeshme deri në vitin 2030

Ndryshimet klimatike po sjellin pasoja gjithnjë e më të ndjeshme në tregun e punës, veçanërisht në Ballkanin Perëndimor, ku Shqipëria vlerësohet të jetë ndër vendet më të goditura nga pasojat e temperaturave të larta dhe rënies së reshjeve. Sipas një raporti të fundit të Organizatës Ndërkombëtare të Punës (ILO), stresi nga nxehtësia do të ketë ndikim të drejtpërdrejtë në uljen e produktivitetit dhe humbjen e vendeve të punës në rajon.

ILO parashikon që deri në vitin 2030, Shqipëria mund të humbasë rreth 0.07 për qind të orëve të punës për shkak të stresit nga nxehtësia, një humbje që përkthehet në rreth 700 vende pune me kohë të plotë. Ky fenomen jo vetëm që dëmton të ardhurat e punëtorëve, por rrit gjithashtu rrezikun për aksidente në vendin e punës, veçanërisht në ditët e para të angazhimit në një pozicion të ri.

Temperaturat ekstreme po kontribuojnë gjithashtu në mungesat në punë për shkak të sëmundjeve të lidhura me nxehtësinë, duke ndikuar negativisht në produktivitetin e përgjithshëm të ekonomisë. Ndikimi i katastrofave natyrore është i dukshëm edhe nga përmbytjet e vitit 2014, kur mbi 33,500 punonjës në Bosnjë dhe Hercegovinë humbën vendin e punës, ndërsa në Serbi, mbi 51,800 vende pune u dëmtuan përkohësisht.

Vetëm gjatë përmbytjeve të tetorit 2024 në Bosnjë dhe Hercegovinë, rreth 1,100 familje u zhvendosën dhe 800 shtëpi u shkatërruan, duke goditur rëndë sektorin e bujqësisë dhe bizneset e vogla.

Sipas një analize të Bankës Botërore, ngjarjet ekstreme të motit kanë një ndikim më të rëndë mbi shtresat më të varfra të popullsisë, të cilët nuk kanë qasje të mjaftueshme në kursime, kredi apo sigurime për të përballuar humbjet. Ndërkohë që të dhënat aktuale fokusohen kryesisht në dëmet mbi infrastrukturën publike, humbjet më të mëdha bien mbi familjet e varfra, duke rrezikuar t’i shtyjnë ato edhe më thellë në varfëri.